Gjykata Themelore në Prishtinë, përmes Departamentit Special, ka njoftuar mbajtjen e seancës fillestare për çështjen penale PS.nr.88/2025. Aktakuza e ngritur nga Prokuroria Speciale e Republikës së Kosovës më 30 dhjetor 2025, ngarkon 21 të pandehur për veprën penale të krimeve të luftës kundër popullsisë civile.
Të akuzuarit në këtë proces janë: Obrad Stevanoviç, Radomir Markoviç, Krsmam Jeliç, Goran Radosavljeviç, Zhivko Trajkoviç, Bogoljub Janiçeviç, Milan Lekiç, Radomir Miliç, Dragan Djorgoviç, Branko Mladenoviç, Dragan Jasoviç, Momçilo Sparavalo, Darko Amanoviç, Srboljub Vujinoviç, Bozhidar Marinkoviç, Zoran Stanojeviç, Milan Josanoviç, Goran Petkoviç, Dragoslav Nikoliç, Çedomir Aksiç dhe Zvonimir Janiçijeviç.
Sipas njoftimit, vepra penale është e sanksionuar sipas nenit 142 lidhur me nenin 22 të Ligjit Penal të ish-RSFJ-së, si dhe neneve 144, 145, 146 dhe 147 lidhur me nenin 31 të Kodit Penal të Republikës së Kosovës. Seanca gjyqësore do të zhvillohet në Pallatin e Drejtësisë në Hajvali (Objekti D), në prani të kryetares së trupit gjykues, Violeta Namani.
Procesi do të zhvillohet në mungesë të të pandehurve, pasi të njëjtit kanë qenë të paarritshëm për autoritetet që nga momenti i ngritjes së aktakuzës.