Departamenti Special i Gjykatës Themelore në Prishtinë ka njoftuar se më 28 shtator 2026, në orën 09:30, do të mbahet seanca e shqyrtimit fillestar në çështjen penale PS.nr.48/25. Në këtë proces, 21 të pandehur akuzohen për veprën penale “Krime lufte kundër popullsisë civile”, të inkriminuar sipas dispozitave të Kodit Penal të Republikës së Kosovës dhe ligjeve të periudhës së ish-RSFJ-së.
Sipas njoftimit zyrtar, seanca do të zhvillohet në sallën nr. 16 të Objektit D në Pallatin e Drejtësisë në Hajvali. Për shkak se të pandehurit kanë qenë të paarritshëm për drejtësinë deri në momentin e ngritjes së aktakuzës, gjykimi do të zhvillohet në mungesë të tyre. Gjykata u ka bërë thirrje publike të akuzuarve që të paraqiten vullnetarisht para organeve të ndjekjes në Republikën e Kosovës. Njëkohësisht, është kërkuar ndihma e qytetarëve që të komunikojnë çdo informacion për vendndodhjen e personave të akuzuar. Dokumentet procedurale, përfshirë aktakuzën dhe ftesat, janë publikuar në faqen zyrtare të gjykatës dhe në Gazetën Zyrtare.
Lista e të akuzuarve përfshin: Zlatomir Peshiq, Mladen Cirkoviq, Radomir Markoviq, Dushko Adamoviq, Obrad Stevanoviq, Zhivko Trajkoviq, Goran Radosavljeviq, Bogoljub Janiçeviq, Sllavisha Ivanoviq, Boshko Vukiqeviq, Sreten Popoviq, Nikolla Petroviq, Krsman Jeliq, Ljubisha Stojimiroviq, Bozhidar Deliq, Radojko Stefanoviq, Dragan Zhivanoviq, Millosh Gjoshan, Ljubinko Cvetiq, Bozhidar Filiq dhe Millovan Kovaçeviq.
Përditësime
Trupi gjykues e ndërpreu seancën e datës 15 shtator 2026, për shkak se mbrojtësve ligjorë u mungonin shkresat e nevojshme të lëndës. Aktakuza e këtij procesi detajon përgjegjësinë për dëbimin e mbi 800 mijë shqiptarëve gjatë vitit 1999. Seanca e radhës është caktuar të mbahet më 28 shtator 2026, duke nisur nga ora 09:30.