Policia greke ka finalizuar një operacion për goditjen e një bande të trafikut të narkotikëve që operonte në ishullin e Mykonos. Në krye të këtij grupi është identifikuar shtetasi shqiptar Euglent Alimani, 37 vjeç, i cili njihej në ishull si biznesmen. Aktiviteti kriminal, i cili kishte nisur në mesin e muajit prill, u shtri në zona të ndryshme, përfshirë Pireun dhe Peramën.
Hetimet kanë zbuluar se anëtarët e bandës përdornin automjetet e një kompanie turistike për të transportuar dhe shpërndarë lëndët narkotike në pikat me fluks të lartë turistësh. Gjatë kontrolleve në banesa dhe ambiente të ndryshme, autoritetet sekuestruan:
• 4.5 kilogramë kokainë dhe kokainë rozë
• Kanabis
• Tableta me substanca farmaceutike
• Ketaminë
• Kërpudha halucinogjene
Sipas njoftimit të policisë, Euglent Alimani ishte organizatori kryesor, përgjegjës për sigurimin e furnitorëve, administrimin e fitimeve dhe menaxhimin e bazave të fshehjes së drogës. Pjesë e grupit ishin edhe një 38-vjeçar, i cili shërbente si zëvendës, një 39-vjeçar përgjegjës për magazinimin dhe sigurimin e klientëve, si dhe dy anëtarë të tjerë, një 25-vjeçar dhe një 38-vjeçare, të cilët mbikëqyrnin ruajtjen dhe shpërndarjen. Njëra nga të arrestuarat raportohet të jetë shtetase rumune, bashkëjetuese e drejtuesit të grupit.
Përditësime
Policia greke njoftoi sot arrestimin e 6 personave pas goditjes së një rrjeti të trafikut të drogës në Mykonos. Hetuesit kanë identifikuar si bashkëpunëtor kryesor një 38-vjeçar grek, ndërsa mes të ndaluarve është edhe një 37-vjeçar shqiptar. Autoritetet sqaruan se zbardhja e ngjarjes u mundësua përmes metodave speciale hetimore dhe analizës së komunikimeve, ndërkohë që prokuroria ka përcaktuar rolin e secilit anëtar në strukturën kriminale.