Policia greke arrestoi dy të rinj më pasditen e 14 prillit në zonën e Agios Panteleimonas në Athinë, të dyshuar për trafik lëndësh narkotike në kuadër të një rrjeti kriminal shqiptar. Bëhet fjalë për një 22-vjeçar të huaj dhe një 19-vjeçar grek, të cilët vepronin me urdhra të një kreu mafie shqiptare, i burgosur në Malandrino. Ky i fundit lidhet me vrasjen e avokatit Michalis Zafeiropoulos në tetor 2017, ndërsa sipas një burimi dyshohet të jetë Eno Alexandros Mata.
Të rinjtë u ndaluan gjatë një patrullimi rutinë nga njësi DI.AS., pasi u vlerësuan të dyshimtë. Gjatë kontrollit u gjetën 61 pako najloni me 89 gram kanabis, gati për shpërndarje, si dhe 520 euro të dyshuara si të ardhura nga aktiviteti.
Në banesën e 22-vjeçarit, efektivët e Nëndrejtorisë së Hetimit dhe Ndjekjes Penale të Krimit sekuestruan 92 gram kanabis shtesë, dy peshore elektronike precize, një numër i madh paketash najloni, një grusht hekuri dhe një thikë të palosshme.
Lidhja me zhvatinë në Selanik
I njëjti bosi dyshohet i përfshirë edhe në një rast zhvatjeje në zonën e Selanikut, për të cilin policia greke arrestoi katër persona më 17 prill 2026, një prej tyre i burgosur. Ata kërkuan 200 mijë euro një administratori kompanie, duke e kërcënuar me jetë; shuma u ul në 100 mijë euro pas negociatave, ndërsa operacioni u finalizua gjatë dorëzimit të 50 mijë eurove. U sekuestruan një armë zjarri me 11 fishekë, telefona celularë, mijëra euro, si dhe në qelinë e të burgosurit telefona dhe një mjet prerës improvizuar.
Të arrestuarit kanë precedentë penalë për vepra të rënda, përfshirë vrasje.