Lëvizjet e brendshme të popullsisë në Shqipëri po dominohen gjithnjë e më shumë nga gratë, sidomos nga vajzat dhe gratë e reja në moshë studimi dhe pune. Të dhënat e publikuara nga INSTAT në raportin "Gra dhe Burra 2025" tregojnë se gjatë vitit 2024 ndryshuan vendbanimin brenda vendit 16.289 gra, kundrejt 9.303 burrave.
Pesha më e madhe e këtyre lëvizjeve përqendrohet te grupmoshat 20-29 vjeç. Në grupmoshën 20-24 vjeç lëvizën 3.080 gra, ndërsa në 25-29 vjeç numri arriti 3.754. Për burrat, në të njëjtat grupmosha shifrat janë 537 dhe 1.098.
Ky fenomen lidhet me zhvendosjen drejt qyteteve të mëdha për studime universitare, punësim ose akses më të mirë në shërbime. Tirana mbetet destinacioni kryesor, sidomos për sektorët e administratës, shërbimeve, call center, teknologjisë, arsimit dhe shëndetësisë, ku punësimi i grave është më i përqendruar.
Raporti evidenton se lëvizjet e brendshme ranë në total gjatë 2024 krahasuar me vitin paraardhës, por dallimi gjinor mbetet i theksuar. Në 2023 kishin ndryshuar vendbanimin 19.805 gra dhe 12.277 burra.
Ekspertët e demografisë e shpjegojnë këtë trend me urbanizimin, shtyrjen e martesës, rritjen e pjesëmarrjes së grave në arsim të lartë dhe kërkimin për pavarësi ekonomike. Sipas sociologut Gëzim Tushi, periferitë po zbrazen dhe nuk formohen më familje të reja atje. Kjo përqendron ekonominë në pak qendra urbane dhe ndikon në lindshmëri si dhe në strukturën familjare në zonat rurale dhe qytetet e vogla.