Trainkos njoftoi se të hënën, më 9 nëntor 2026, pritet të ketë ndërprerje të qarkullimit të trenave në Kosovë për shkak të grevës së paralajmëruar nga organizatat sindikale të Infrakos, ndërmarrja përgjegjëse për menaxhimin e infrastrukturës hekurudhore.
Sipas njoftimit të Trainkos-it, treni nr. 4201, i cili niset nga Prishtina në orën 07:50, do ta përfundojë udhëtimin në Fushë Kosovë, pa vazhduar sipas itinerarit të planifikuar. Infrakos ka paralajmëruar se në orën 08:00 do të ndërpresë ofrimin e shërbimeve infrastrukturore.
Pas këtij treni, të gjithë trenat e tjerë do të ndalojnë qarkullimin deri në normalizimin e situatës dhe rikthimin e shërbimeve nga Infrakos. Trainkos u ka kërkuar mirëkuptim udhëtarëve, duke theksuar se situata është jashtë mundësive të saj operative.
Ndërmarrja ka njoftuar se udhëtarët do të informohen me kohë për zhvillimet e reja dhe rifillimin e qarkullimit. Kohëzgjatja e ndërprerjes së shërbimeve hekurudhore nuk është bërë e ditur.