Tri kompani transporti nga komuna e Fushë Kosovës kanë njoftuar pezullimin e përkohshëm të shërbimeve të transportit publik në katër linja drejt kryeqytetit, duke filluar nga data 19 gusht 2026. Kompanitë PEP Trans, Egzoni Tours dhe Eni Trans SH.P.K. deklaruan se vendimi është pasojë e vështirësive të mëdha financiare dhe pamundësisë për të mbuluar shpenzimet e karburantit dhe kostot e tjera të operimit.
Linjat që do të ndërpriten përfshijnë qarkullimin në itineraret:
- Grabovc – Prishtinë – Grabovc
- Harilaq – Prishtinë – Harilaq
- Hencë – Prishtinë – Hencë
- Miradi e Epërme – Prishtinë – Miradi e Epërme
Në një njoftim të përbashkët, operatorët theksuan se ky vendim nuk është marrë me dëshirën e tyre dhe se ata janë drejtuar institucioneve kompetente për të kërkuar një zgjidhje për vazhdimin e transportit. Sipas tyre, është e domosdoshme që institucionet të ndërmarrin hapa konkretë për të mundësuar rikthimin e shërbimit, pasi ky ndërprerje krijon vështirësi të konsiderueshme për banorët e këtyre lokaliteteve që varen nga ky shërbim për lëvizjet e tyre të përditshme drejt Prishtinës.