Mekanizmi Ndërkombëtar Rezidual për Tribunalet Penale në Hagë ka refuzuar të premten kërkesën për lirimin e parakohshëm të ish-shefit të Shërbimit të Sigurimit Shtetëror të Serbisë (UDB), Jovica Stanishiqit. Vendimi pason kërkesën e paraqitur nga Stanishiq në mars të këtij viti, pasi ai kishte plotësuar kushtin për të kërkuar lirim pas vuajtjes së dy të tretave të dënimit.
Kryetarja e këtij Mekanizmi, Graciela Gatti Santana, sqaroi në arsyetimin e saj se, ndonëse i dënuari ka plotësuar kushtin kohor, ekzistojnë arsye thelbësore që nuk lejojnë marrjen e një vendimi pozitiv. Si faktorë kryesorë u evidentuan rëndësia dhe pesha e krimeve për të cilat ai është shpallur fajtor, si dhe mungesa e dëshmive bindëse për rehabilitimin e tij gjatë kohës së qëndrimit në burg. Po ashtu, gjykata theksoi se nuk janë paraqitur arsye bindëse me natyrë humanitare që do të justifikonin ndryshimin e masës.
Në maj të vitit 2023, Stanishiq dhe ish-bashkëpunëtori i tij, Franko Simatoviq, u dënuan me nga 15 vjet burgim përmes aktgjykimit përfundimtar. Ata u shpallën fajtorë për pjesëmarrje në një ndërmarrje të përbashkët kriminale, krime kundër njerëzimit, vrasje, dëbime dhe përndjekje të popullsisë në disa zona të Bosnjë e Hercegovinës dhe Kroacisë gjatë periudhës 1991–1995.