Në të gjitha bashkitë e Shqipërisë janë hapur 6 mijë vende pune të lira, si në sektorin publik ashtu edhe në atë privat. Sipërmarrjet ofrojnë paga më të larta dhe profile të ndryshme profesionalësh.
Sipas Gertiola Çepani, përgjegjëse e Shërbimit të Punësimit në AKPA, trendi i vendeve të lira ka ndryshuar. "Nëse më parë numri më i madh i tyre ishte në industrinë përpunuese, tani kemi shumë vende të lira pune në fushën e teknologjisë së informacionit, hoteleri-turizmit dhe ndërtimit. Pra, kemi një trend më ndryshe", deklaroi ajo.
Agjencia Kombëtare e Punësimit dhe Aftësive ka shpallur këto vende, të ndara sipas qyteteve. Qytetet me numrin më të lartë janë:
• Tirana, për shkak të përqendrimit më të lartë të bizneseve;
• Durrësi;
• Fier;
• Vlora.
Procesi i aplikimit është thjeshtuar plotësisht online. Punëkërkuesit mund të hapin llogarinë në portalin puna.gov.al, të ngarkojnë CV-në dhe të aplikojnë pa ndërveprim me palë të treta, sqaron Gertiola Çepani.
Për të zbutur mungesën e fuqisë punëtore, qeveria pritet të vërë së shpejti në zbatim skemën "trajnim duke punuar, kundrejt pagesës". Kjo do të bashkë-financohet nga qeveria dhe sipërmarrjet.