Ministria e Ekonomisë dhe Inovacionit ka prezantuar një projektligj që synon ndryshimin e ligjit nr. 15/2019 “Për nxitjen e punësimit”. Reforma parashikon rritjen e transparencës në tregun e punës dhe përafrimin e legjislacionit shqiptar me standardet e Bashkimit Evropian.
Transparenca e pagave dhe raportimi
Sipas projektligjit, punëdhënësit do të kenë detyrimin ligjor të bëjnë publike intervalin e pagës për çdo pozicion të shpallur si vend i lirë pune pranë strukturave përkatëse. Për më tepër, kompanitë do të duhet të raportojnë pranë institucioneve të dhëna lidhur me marrëdhëniet e punës, përfshirë largimet nga puna, duke specifikuar arsyen dhe kontaktin e punonjësit për të mundësuar një ndërhyrje më të shpejtë të shërbimeve të punësimit.
Kuotat për grupet e veçanta
Bizneset që kanë të paktën 125 punonjës do të përballen me një regjim tranzitor për punësimin e personave nga grupe të veçanta. Për 125 punonjësit e parë, kompania do të ketë detyrimin të punësojë një person nga këto kategori, ndërsa për çdo 125 punonjës të tjerë do të kërkohet një punësim shtesë. Në rast të mosplotësimit të këtyre kuotave, punëdhënësi do të derdhë një kontribut në Fondin Social të Punësimit, në masën 50% të pagës minimale në shkallë vendi, për çdo muaj dhe për çdo vend të pambuluar.
Modernizimi dhe integrimi digjital
Projektligji krijon bazën për dy instrumente të reja:
• Pasaporta Digjitale e Punësimit dhe Aftësive: Një dokument elektronik që përmban historikun profesional, kualifikimet dhe përvojën e punonjësit, i administruar përmes një platforme të integruar me bazat shtetërore të të dhënave.
• Observatori i Informacionit të Tregut të Punës dhe Aftësive: Një mekanizëm kombëtar për mbledhjen, analizimin dhe shpërndarjen e të dhënave mbi tregun e punës.
Në kuadër të modernizimit, Shqipëria synon integrimin në Rrjetin Evropian të Shërbimeve të Punësimit (EURES). Institucioni përgjegjës për punësimin do të veprojë si Zyrë Kombëtare Koordinuese, duke koordinuar shkëmbimin e informacionit për vendet e lira të punës dhe profilet e punëkërkuesve me vendet e Bashkimit Evropian. Shkeljet e këtyre detyrimeve do të sanksionohen nga administrata tatimore si kundërvajtje administrative.