Aksi rrugor Qukës–Qafë Plloçë do të hapet plotësisht për qarkullim më 19 janar 2026, pas 11 ditësh bllokimi për shkak të rrëshqitjes masive në lotin e 3-të, e shkaktuar nga reshjet e 7 janarit 2026.
Punonjësit e kompanisë kanë larguar sasitë e mëdha të gurëve dhe dheut nga sipërfaqja e rrugës. Tashmë po kryhen pastrimet e fundit dhe larja nga balta për të mundësuar qarkullimin e plotë në të dy korsitë.
Sot, 18 janar, lëvizja për mjetet e zonës së Mokrës ka nisur me kufizime dhe vetëm në një korsi në zonën e rrëshqitjes. Punimet për sigurimin e skarpatave dhe rehabilitimin e asfaltit të dëmtuar, ku shkëmbinjtë kanë shkaktuar gropa, do të vazhdojnë.
Është pastruar gjithashtu vendi i rrëshqitjes së dytë masive në dhjetor, për të cilën u ndërtua një bypass për kalimin e mjeteve. Kjo pjesë rruge do të hapet në vijim.
Kjo është shembja e tretë masive e skarpatave që nga inagurimi i rrugës. Shkaktohen nga reshjet e dendura të shiut dhe terreni argjilor delikat, i cili favorizon rrëshqitje të tilla.
Inxhinierët thonë se deri tani nuk janë konstatuar zona të tjera me rrezik në lotin e 3-të, por do të kryhet një kontroll i plotë.