Autoriteti Rrugor Shqiptar (ARRSH) njoftoi se rruga e Thethit është hapur për kalimin e mjeteve. Në Qafë Thore është punuar pa ndërprerje gjatë gjithë natës.
Temperatura e ulët, deri në -10°C, ndihmoi në stabilizimin e dëborës dhe vijimin e punës për hapjen e rrugës. Rruga u hap nga Thethi në drejtim të Bogës, ku ka filluar lëvizja e mjeteve. Kontraktori i mirëmbajtjes me mjetet borëpastruese po bën kriposjen dhe zgjerimin e pjesës kaluese për të garantuar qarkullimin sa më të sigurt.
ARRSH këshillon drejtuesit e mjeteve të qarkullojnë me kujdes dhe të jenë të pajisur me zinxhirë kur udhëtojnë drejt këtij aksi.