Ramush Haradinaj, kryetar i Aleancës për Ardhmërinë e Kosovës, gjatë vizitës në Shtetet e Bashkuara të Amerikës, ka kërkuar mbështetjen e presidentit Donald Trump dhe të Kongresit Amerikan për anëtarësimin e Kosovës në NATO.
Ai e bëri të ditur këtë përmes një postimi në Facebook, ku shpjegoi se çështjen e ka ngritur në një takim me kongresistin republikan nga Teksasi, Pete Sessions.
"Gjatë vizitës në Kongresin Amerikan, kam kërkuar mbështetjen e Presidentit Trump dhe të Kongresit Amerikan për anëtarësimin e Kosovës në NATO. Këtë çështje e kam adresuar në një takim me kongresistin republikan nga Teksasi, Pete Sessions", ka shkruar Haradinaj.
Në një video të publikuar në Facebook, Haradinaj shprehet se Kosova është krenare për partneritetin me SHBA-në dhe është gati të bashkohet me të në angazhimet globale.
"Jemi krenarë për historinë tonë, për atë që kemi kaluar dhe ku jemi sot. Besoj se jemi gati t’i bashkohemi Shteteve të Bashkuara në të gjitha aspektet e angazhimit të tyre global, përfshirë edhe duke u bërë anëtar i NATO-s. Ne jemi të vegjël, NATO tashmë është tek ne, por jemi gati të bashkohemi dhe të shërbejmë me bijtë dhe bijat tona kudo në botë", tha ai.
Haradinaj po qëndron në SHBA si i ftuar në National Prayer Breakfast, si dhe do të marrë pjesë në aktivitete zyrtare dhe takime me përfaqësues politikë. Ai pritet të mbajë fjalim në Capitol Hill.
Përditësime
Ramush Haradinaj u takua me Daniel Lawton, Zëvendës Ndihmës Sekretar të Departamentit të Shtetit të SHBA-së. Lawton theksoi mbështetjen e palëkundur të SHBA-së ndaj Kosovës. Haradinaj deklaroi se anëtarësimi i Kosovës në NATO kontribuon në paqen dhe stabilitetin e Ballkanit Perëndimor dhe të komunitetit euro-atlantik.
Ramush Haradinaj u takua me kongresmenin Keith Self, kryetar i Nënkomisionit për Evropën në Komisionin e Punëve të Jashtme të Kongresit amerikan.
Self, ish-oficer i Ushtrisë amerikane, i diplomuar në West Point dhe veteran i Forcave Speciale, diskutoi mbështetjen për Kosovën.
Haradinaj falënderoi për mbështetjen dhe theksoi anëtarësimin në NATO si rrugë strategjike.
Pritet të zhvillojë takime në Pentagon.