Ramush Haradinaj, kryetar i AAK-së, ka përkujtuar ngjarjen e 3 majit 1999, kur forcat serbe ndaluan kolonën e civilëve nga fshatrat Vraniq, Bukosh, Savrovë dhe Sopijë, të cilët po dëboheshin me dhunë drejt Shqipërisë.
Nga kjo kolonë, 35 civilë – burra, gra, fëmijë, të mitur e të moshuar – u ndanë me forcë dhe u masakruan në oborrin e shkollës së Bukoshit, pa u kursyer as të miturit e as pleqtë.
Përmes një postimi në Facebook, Haradinaj shkruan se familje të tëra dhanë gjakun e tyre për lirinë e Kosovës. "Kjo sakrificë na obligon që të mos ndalemi kurrë në kërkimin e drejtësisë dhe në ndëshkimin e atyre që urdhëruan e kryen krime kundër shqiptarëve", thekson ai.