Albulena Haxhiu, kryetare e Kuvendit të Kosovës, së bashku me deputetet e Lëvizjes Vetëvendosje (LVV), bëri homazhe te memoriali Heroinat në Prishtinë për nder të Ditës Ndërkombëtare të Gruas, më 8 mars.
Në postimin e saj në Facebook, Haxhiu shkroi se dita filloi pranë këtij memoriali, të kushtuar të mbijetuarave të dhunës seksuale gjatë luftës së fundit në Kosovë. "Sot më 8 mars, së bashku me deputetet e Republikës së Kosovës, ditën e filluam pranë memorialit që i dedikohet të mbijetuarave të dhunës seksuale gjatë luftës së fundit në Kosovë. Çdo medaljon këtu përmban histori në ndërgjegjen tonë kolektive", deklaroi ajo.
Haxhiu theksoi se në këtë ditë, e kushtuar grave në mbarë botën, kujtimi për këto gra është më i thellë. "Qëndrueshmëria dhe dinjiteti i tyre janë forca jonë. Kujtesa për to është zotim që drejtësia të mos zbehet dhe që historia e tyre të mbetet pjesë e vetëdijes së Republikës sonë", shtoi kryetarja e Kuvendit.
Ajo kujtoi sakrificën e të gjitha grave që kanë kontribuar për Republikën e Kosovës, qoftë para luftës, gjatë saj apo pas saj. "Le të kujtojmë sukseset, le t’i nderojmë ato, t’i duartrokasim sukseseve të secilës grua të Republikës, secilës vajzë, qoftë në shoqëri, familje apo institucione", u shpreh Haxhiu.
Si kryetare e Kuvendit, ajo premtoi angazhim maksimal për nderimin e grave.