Pas raportimeve për helmimin e 60 kursantëve të Akademisë së Sigurisë, të cilët u paraqitën në urgjencën e QSUT-së me simptoma të të vjellave, ka reaguar kompania e kateringut SORI-AL. Ky është rasti i dytë i raportuar në një periudhë të shkurtër, pas një ngjarjeje të ngjashme që ndodhi në muajin maj.
Në deklaratën e saj zyrtare, shoqëria SORI-AL Sh.p.k. pohon se po bashkëpunon me institucionet për zbardhjen e ngjarjes. Përfaqësuesit e kompanisë theksojnë se, sipas informacionit të tyre, studentët e prekur janë në gjendje të mirë shëndetësore dhe janë rikthyer në mjediset e akademisë.
Kompania ka ngritur dyshime mbi faktorët që mund të kenë ndikuar në këtë situatë, duke renditur dy çështje kryesore:
- Prania e produkteve ushqimore të porositura nga jashtë sistemit të kontraktuar, të cilat futen dhe konsumohen brenda mjediseve të Akademisë së Sigurisë.
- Mangësitë në kushtet higjieno-sanitare, specifikisht mungesa e mundësive për larjen e duarve me ujë të ngrohtë dhe detergjent përpara konsumimit të vakteve.
SORI-AL, e cila operon prej më shumë se 23 vitesh në sektorin e kateringut dhe shpërndan mbi 1.000 racione në ditë, deklaroi se pas incidentit të muajit maj kishte forcuar masat e autokontrollit dhe mbikëqyrjes së zinxhirit ushqimor. Kompania kërkon që elementet e përmendura të jenë pjesë e hetimit objektiv të autoriteteve kompetente.
Përditësime
Kompania SORI-AL ka mohuar përgjegjësinë lidhur me rastin e helmimit të kursantëve në Akademinë e Sigurisë. Në reagimin e saj, kompania deklaroi se studentët konsumojnë ushqim menjëherë pas stërvitjeve intensive dhe publikoi dokumentacionin e monitorimeve të brendshme. Sipas këtij raporti, shkeljet e higjienës dyshohet se kanë ardhur nga ushqimet e sjella nga jashtë ambienteve të Akademisë.