Shoqëria SORI-AL sh.p.k., e cila ofron shërbimin e ushqimit për Akademinë e Sigurisë, ka reaguar sërish lidhur me situatën e rënduar shëndetësore të studentëve. Në deklaratën e saj zyrtare, kompania pohon se pas një analize të kryer nga ekspertë të fushës, nuk rezulton që ushqimi i shërbyer të jetë shkaku i simptomave të raportuara, të cilat përfshijnë temperaturë të lartë dhe këputje fizike.
Në njoftimin për mediat, kompania nënvizon se në ambientet e Akademisë së Sigurisë është evidentuar prania e virozave sezonale, duke kërkuar që ky faktor të përfshihet në hetimin epidemiologjik nga institucionet kompetente. Sipas SORI-AL, është e nevojshme të analizohen të gjitha rrethanat, përfshirë kushtet e konsumimit të ushqimit dhe gjendjen epidemiologjike në institucion.
Nga ana tjetër, ndonëse kompania i bën thirrje organeve ligjzbatuese për një hetim të plotë dhe të paanshëm, burime pranë çështjes kanë shprehur skepticizëm ndaj tezës së virozave. Sipas këtyre burimeve, shfaqja e simptomave te 64 persona njëkohësisht e bën pak të besueshme hipotezën e një virusi sezonal, duke lënë të hapur mundësinë e hetimeve të mëtejshme për të zbardhur shkakun e vërtetë të incidentit.