Autoriteti Kombëtar i Ushqimit (AKU) ka pezulluar aktivitetin e shoqërisë SORI-AL në Akademinë e Sigurisë në Sauk dhe në Garnizonin Skënderbej, pas simptomave të shfaqura nga studentët më 6 maj 2026. AKU ka vendosur gjithashtu një gjobë prej 1.5 milionë lekësh për ushqim të pasigurt dhe shkelje të kushteve higjieno-sanitare.
Sipas AKU-së, nga 9 mostra të marra në kuzhinën e Akademisë, tetë rezultuan në përputhje me standardet, ndërsa një mostër makarone të gatshme doli jokonforme për ngarkesë të lartë bakteriale të Escherichia coli dhe Staphylococcus koagulase-pozitiv.
Shoqëria SORI-AL ka reaguar me një deklaratë publike, duke kundërshtuar masat e AKU-së. Kompania thekson se dokumentacioni i Shërbimit Infektiv pranë Qendrës Spitalore Universitare Tiranë (QSUT) përshkruan rastet si gastroenterit akut i dyshuar, pa konfirmim laboratorik për helmim ushqimor. Pacientët kanë shfaqur simptoma të lehta deri mesatare, kanë marrë trajtim simptomatik dhe janë larguar nga spitali brenda 1-4 orësh, në gjendje të stabilizuar.
SORI-AL shton se analizat e Institutit të Shëndetit Publik nuk kanë identifikuar patogjenë viralë apo bakterialë tek të prekurit, ndërsa tamponët e personelit dolën negativë për Salmonella dhe Shigella. Analizat e ujit rezultuan brenda standardeve. Kompania shpjegon se mostra jokonforme lidhet me një produkt të papërdorur dhe jo me vaktin e drekës të incidentit.
Kompania e cilëson bllokimin si të pajustifikuar dhe jashtë rekomandimeve epidemiologjike, paralajmëron ndjekje të rrugëve ligjore dhe njofton se ka ndërmarrë masa higjieno-sanitare të menjëhershme si dhe bashkëpunon me institucionet.