Pas ngjarjes së rëndë ku Refit Buzi vrau ish-vjehrrit dhe më pas veten, kanë dalë në dritë detaje mbi procedimin penal për veprën penale “Mashtrimi” që kishte nisur ndaj 35-vjeçarit. Pas katër vitesh jetesë në Angli, Buzi ishte kthyer në Shqipëri gjatë vitit 2024 për të zhvilluar aktivitet si ndërmjetës në eksportin e fruta-perimeve, fillimisht pa licencë apo NIPT.
Detajet e aktivitetit tregtar
Buzi kishte hyrë në bisedime me shtetasit S. H. dhe F. R. për të dërguar mallra te biznesi i shtetasit turk B. G. në Enfield. Sipas dokumentacionit, dy dërgesa të fiskalizuara më 23.04.2024 dhe 28.04.2024 kishin vlerat përkatëse prej 31 872 paund dhe 32 177 paund.
Sipas dëshmisë së dhënë nga Refit Buzi më 27.12.2024, ai kishte rënë dakord me B. G. që pagesa të kryhej brenda 7 ditëve nga mbërritja e kamionëve. Megjithatë, pas dërgesës së parë me një kosto transporti prej 6 500 euro, blerësi turk filloi të vononte pagesat, duke shkaktuar konflikte me bashkëpunëtorët shqiptarë që kërkonin paratë nga Buzi.
Pretendimet e palëve
Sipas autoriteteve, kishte mospërputhje lidhur me pagesat. Bashkëpunëtorët S. H. dhe F. R. pretendonin se Refit Buzi kishte marrë një pjesë të parave nga kompania e shtetasit turk, bazuar në dëshmi indirekte. Nga ana e tij, Buzi shpjegoi për policinë se kishte marrë vetëm shumat për mbulimin e transportit, rreth 13 400 paund, dhe se blerësi turk kishte refuzuar të shlyente pjesën tjetër të vlerës së mallit. Buzi theksoi gjithashtu se një shoqëri tjetër nga Lushnja, e përfshirë në dërgesat e mëvonshme, kishte ndjekur rrugën ligjore përmes një procesi gjyqësor në Angli ndaj shtetasit B. G. për të rimarrë detyrimet e pashlyera.