Tuneli i Llogarasë ka filluar të rrjedhë ujë që në shirat e parë, duke krijuar rrezik për jetën e udhëtarëve që kalojnë në të. Kjo situatë lidhet me cilësinë e dobët të punimeve në këtë vepër publike, ndërtimi i së cilës ka shkaktuar një dëm prej rreth 50 milionë eurosh për buxhetin e shtetit.
Hetimi i thelluar i Strukturës së Posaçme Kundër Korrupsionit dhe Krimit të Organizuar (SPAK) për aferën e 190 milionë eurove ka zbuluar shkelje serioze, që prekin jo vetëm drejtuesit politikë, por edhe Drejtorinë e Përgjithshme të Tatimeve. Sipas të dhënave, kjo drejtorie ka lejuar kompaninë ndërtuese të operojë për rreth tre vjet pa dokumentacion të vlefshëm ligjor, ndërsa i ka njohur asaj të drejtën e kreditimit të TVSH-së për mallrat dhe shërbimet e përdorura në ndërtim.
Ligji për Tatimin mbi Vlerën e Shtuar parashikon se bizneset e ndërtimit mund të kreditojnë TVSH-në vetëm pas marrjes së lejes së ndërtimit dhe regjistrimit të projektit në administratën tatimore. Në rastin e tunelit të Llogarasë, leja e ndërtimit u bë e vlefshme vetëm në maj të vitit 2025, kur punimet kishin përfunduar dhe objekti ishte gati për përurim. Përgjegjësia për kontrollin e aktivitetit të kompanisë bie mbi Drejtorinë e Përgjithshme të Tatimeve.
Burime bëjnë të ditur se përgjegjësit direkt për këto shkelje janë ish-drejtori i përgjithshëm Ceno Klosi dhe pasuesja e tij që nga korriku 2024, Elidjana Çelaj. Kjo dyshe jo vetëm ka lejuar ndërtimin pa leje, por nuk ka verifikuar se tunelin nuk e ka ndërtuar firma fituese e tenderit, një kompani turke, por kompani të tjera shqiptare. Gjithashtu, dyshimet përfshijnë rritje fiktive të faturave dhe favorizimin e kësaj kompanie turke, e cila sipas hetimeve nuk ka kryer punime reale.
Këto veprime tregojnë për standarde të dyfishta në veprimtarinë e administratës tatimore, ku kontrolli mungon për projekte të mëdha publike.