Zv.kryeministrja Belinda Balluku është në fokusin e hetimeve të Strukturës së Posaçme Kundër Korrupsionit dhe Krimit të Rëndë të Organizuar (SPAK) për çështjen e tunelit të Llogarasë. Projekti u prezantua fillimisht me vlerë rreth 190 milionë euro, por kostos iu shtuan 50 milionë euro të tjera.
Gjykata Kushtetuese pritet të japë më 22 janar vendimin për pezullimin ose jo të Ballukut nga detyra. Në të njëjtën kohë, Kuvendi pret shqyrtimin e kërkesës së SPAK-ut për heqjen e imunitetit të saj, me qëllim arrestimin.
Deklarata e SHBA-së
E ngarkuara me punë e Ambasadës së Shteteve të Bashkuara në Tiranë, Nancy Van Horn, deklaroi pas takimit me kryetaren e Gjykatës Kushtetuese, Fiona Papajorgji: "Gjykata Kushtetuese luan një rol të rëndësishëm në garantimin e drejtësisë për qytetarët shqiptarë, duke i mbajtur përgjegjës ata që shkelin ligjet e saj".
Detajet e hetimit
Burime pranë SPAK-ut bëjnë të ditur se hetimi pritet të zbardhë çdo dimension të çështjes. Përgjegjësia penale nuk kufizohet te Ministria e Infrastrukturës dhe Agjencia e Rregullimit, Mbikëqyrjes dhe Sigurimit të Infrastrukturës Rrugore (ARRSH).
Në shënjestër është edhe Drejtoria e Përgjithshme e Tatimeve, e cila dyshohet se ka lejuar kompaninë ndërtuese të operojë për afro tre vjet pa dokumentacion të vlefshëm ligjor. Gjithashtu, është aprovuar kreditimi i TVSH-së për këto kompani, në kundërshtim me ligjin.
Si përgjegjës direktë përmenden ish-drejtori i Tatimeve, Ceno Klosi, dhe pasuesja e tij, Elidjana Çelaj. SPAK ka nisur procedurat kundër tyre.