Hetuesit policorë kanë nisur intervistime masive në Prizren ndaj personave të dyshuar për manipulim votash gjatë procesit zgjedhor të 28 dhjetorit. Sipas burimeve, mbi 100 komisionerë dhe zyrtarë të Komisionit Qendror të Zgjedhjeve merren në pyetje në cilësinë e të dyshuarve, në lidhje me dyshimet për transferim mijëra votash nga një kandidat për deputet te një tjetër.
Intervistimet zhvillohen në tri stacione policore: ALFA, Lubizhdë dhe Suharekë. Shumica e të ftuarve paraqiten në orën 08:00, ndërsa një pjesë tjetër në orën 10:00, sipas planit operacional. Hetuesit nga Krimet Ekonomike, DKKO dhe stacionet policore ballafaqojnë të dyshuarit me prova, përfshirë materiale elektronike, filmime dhe elemente nga rinumërimi i votave.
Autorizimi dhe dyshimet
Prokuroria Themelore në Prizren, në krye me prokurorin Petrit Kryeziu, ka autorizuar me shkrim Policinë e Kosovës për të identifikuar përgjegjësit dhe për të siguruar prova, si procesverbalet dhe nënshkrimet. Pas monitorimit të rinumërimit, janë evidentuar dallime mes fletëvotimeve dhe votave të numëruara për kandidatët brenda subjekteve politike, duke ngritur dyshime për keqpërdorime të orkestruara dhe falsifikim dokumentesh zgjedhore.
Disa të dyshuar kanë angazhuar avokatë, çka mund të ngarkojë procesin. Burimet nuk përjashtojnë mundësinë e ndalimit për 48 orë të personave me dyshime të bazuara për përfshirje direkte. Informacionet vijnë nga Betimi për Drejtësi dhe Sinjali.
Përditësime
Policia e Kosovës konfirmoi operacionin në Prizren përmes zëdhënses Luljeta Mehmeti.
- Rreth 140 komisionerë u angazhuan në numërimin e votave.
- 45,709 vota u shtuan ose u hoqën gjatë numërimit fillestar vetëm në Prizren.
- Koordinatorja Laura Pula paralajmëron intervistimin e të gjithë komisionerëve dhe kandidatëve për deputetë.
- KQZ vendosi rinumërimin e të gjitha vendvotimeve në Prizren për dallim 714 votash.
- Struktura: 28 tavolina me nga 5 komisionerë nga VV, PDK, LDK, AAK dhe komunitete.
- Dënimi i mundshëm: burgim 1-5 vjet sipas ligjeve në fuqi.
- Kryeprokurori Petrit Kryeziu do të mbajë sot pasdite konferencë për shtyp për detaje të hetimeve.
- Disa komisionarë janë ndaluar në Prizren, pa vendime të shkruara.
Policia kërkon rreth 20 komisionerë që nuk iu përgjigjën ftesës për intervistim.
Deri tani janë intervistuar mbi 60 zyrtarë të KQZ-së në kuadër të hetimit për manipulim votash në Prizren.
Zhvillimet e reja pengojnë procesin e intervistimeve masive.
Policia konfirmoi ndalimin e 109 personave për falsifikim të rezultateve të votimit dhe të një tjetri për kanosje. Gjatë operacionit Manipulimi, të drejtuar nga 103 hetues, autoritetet sekuestruan 108 telefona. Është publikuar lista e plotë me emrat e të ndaluarve. Veprimet u zhvilluan në QKN gjatë periudhës 29.12.2025 – 02.01.2026.