Ministri i Mjedisit Jetësor dhe Planifikimit Hapësinor, Muamet Hoxha, prezantoi më 28 tetor në Shkup pesë modulet e nismës “Kthesa e gjelbër përmes digjitalizimit”. Sipas ministrit, ato synojnë rritjen e transparencës, përmirësimin e menaxhimit të të dhënave dhe proceseve mjedisore, si dhe thjeshtimin e procedurave administrative. Hoxha tha se digjitalizimi është një instrument politik për drejtësi dhe transparencë.
Moduli “Themelet” do t’u japë qytetarëve, mediave dhe organizatave të shoqërisë civile qasje në informacione për projektet e ministrisë, përfshirë vlerën, afatet, vendndodhjen dhe burimet e financimit. Moduli “Digjitalizimi i brendshëm” përfshin digjitalizimin e arkivit dhe të sistemit të informacionit hapësinor. Arkivi digjital do të mundësojë ndjekjen elektronike të lëndëve, qasjen në statusin e tyre dhe identifikimin e nëpunësit përgjegjës. Procesi zhvillohet në bashkëpunim me Ministrinë e Transformimit Digjital. Digjitalizimi i sistemit të informacionit hapësinor ka përfunduar dhe përfshin të dhëna gjeohapësinore për zonat e mbrojtura.
Moduli “Koha” lidhet me reformat për thjeshtimin e procedurave administrative. Nga rreth 30 hapa të planifikuar, 15 parashikohet të realizohen në fazën e parë, e cila duhet të përfundojë deri në fund të vitit.
Moduli “Toka” parashikon hartëzimin digjital të deponive ilegale nëpër komuna. Të dhënat synojnë të ndihmojnë planifikimin e mjeteve financiare dhe burimeve për pastrimin e tyre, si dhe përgatitjen për krijimin e qendrave rajonale të menaxhimit të mbeturinave. Funksionaliteti i platformës do të konsultohet me organizatat e shoqërisë civile, BNJVL-në dhe ekspertët. Realizimi i saj është parashikuar në buxhetin e vitit 2027. Ndërkohë, në disa komuna po zbatohet një projekt pilot për mbikëqyrjen me kamera të deponive ilegale.
Moduli “Ajri” parashikon krijimin e një regjistri digjital, ku 140 operatorë me leje ekologjike të integruara të kategorisë A do të publikojnë të dhëna për emetimet, sipas kushteve të lejeve të tyre. Regjistri lidhet me Ligjin për Kontrollin e Emetimeve në Ajër, i cili hyn në fuqi në shtator të vitit 2027.
Ministria tha se do t’i prezantojë modulet veçmas, me hollësi për funksionimin dhe përfitimet e tyre për qytetarët. Hoxha e përshkroi nismën si “një sistem të ri vlerash” dhe “kthesën tonë të gjelbër”.