Ngjarja ka ndodhur të hënën, rreth orës 09:00, në një objekt ndërtimi në lagjen Arbana të Prizrenit. Viktima, i lindur në vitin 2001, ishte duke marrë pjesë në procesin e zbrazjes së betonit kur është goditur nga një gyp i shkëputur nga mikseri i kamionit.
Zëdhënësi i Policisë së Kosovës për rajonin e Prizrenit, Shaqir Bytyqi, konfirmoi se viktima është dërguar pa shenja jete në ambulancën e lagjes. Sipas hetimeve fillestare, incidenti ndodhi gjatë procesit të betonimit, kur pjesë të pajisjes së punës goditën punëtorin me pasoja fatale.
Menjëherë pas rastit, policia ka njoftuar Prokurorinë Themelore në Prizren dhe Inspektoratin e Punës. Lidhur me këtë vdekje, është ndaluar një person, i cili po mbahet në ndalim policor prej 48 orësh. Prokuroria po vijon veprimet hetimore për zbardhjen e rrethanave të ngjarjes dhe përcaktimin e përgjegjësive ligjore për shkelje të sigurisë në punë, sipas nenit 358 të Kodit Penal të Republikës së Kosovës.