Një ngjarje e rëndë ka ndodhur mbrëmjen e 6 gushtit në qytetin e Roskovecit, ku një 69-vjeçar ka ndërruar jetë si pasojë e një arresti kardiak. Viktima, i identifikuar si Baftiar Vrapi, është dërguar pa shenja jete në Qendrën Shëndetësore të qytetit rreth orës 20:00.
Sipas njoftimit zyrtar të Policisë së Fierit, viktima ka pësuar arrest kardiak teksa ka qenë i pranishëm gjatë një konflikti të çastit, i cili po zhvillohej midis djalit të tij dhe një shtetasi tjetër. Burimet zyrtare bëjnë me dije se 69-vjeçari nuk ka qenë i përfshirë në konfliktin fizik midis palëve.
Grupi hetimor, nën drejtimin e Prokurorisë, ka nisur menjëherë punën për të kryer veprimet procedurale dhe për të sqaruar rrethanat e plota të ngjarjes. Aktualisht po vijon puna për zbardhjen e detajeve të incidentit, ndërkohë që shkaku paraprak i vdekjes së shtetasit Baftiar Vrapi mbetet arresti kardiak.