Një ngjarje tragjike është raportuar gjatë një fluturimi komercial që po udhëtonte nga Zvicra për në Kosovë, ku një pasagjer ka humbur jetën pak çaste përpara se aeroplani të ulej në pistë.
Sipas informacioneve të siguruara, viktima është një 34-vjeçar. Pas konstatimit të ngjarjes, pasagjerët e tjerë në bord kanë qëndruar të mbyllur brenda mjetit fluturues për një periudhë prej rreth një ore, kohë gjatë së cilës situata është përshkruar si e tensionuar.
Ekipet emergjente kanë mbërritur në vendngjarje dhe kanë kryer procedurat për tërheqjen e trupit nga aeroplani. Më pas, autoritetet kompetente kanë konstatuar zyrtarisht vdekjen e 34-vjeçarit. Deri në këto momente, nuk ka ende njoftime zyrtare lidhur me rrethanat apo shkaqet mjekësore që çuan në ndërrimin e jetës së pasagjerit.
Përditësime
Policia e Kosovës konfirmoi se një 34-vjeçar ka ndërruar jetë në Qendrën Klinike Universitare të Kosovës (QKUK), pasi ishte transportuar nga aeroporti më 14 qershor 2026. Autoritetet kanë iniciuar rastin si "Hetim mbi vdekjen", ndërsa trupi i pajetë është dërguar në Institutin e Mjekësisë Ligjore për obduksion.