Ngjarja e rëndë ka ndodhur në lagjen nr. 1 të qytetit të Korçës, ku një 84-vjeçare ka humbur jetën në mënyrë të papritur. Sipas informacioneve paraprake, e moshuara nuk është ndjerë mirë dhe ka njoftuar fqinjen e saj për ndihmë.
Në momentin kur fqinja ka mbërritur dhe viktima i ka hapur derën, ajo është rrëzuar në oborrin e banesës dhe ka ndërruar jetë. Megjithëse është njoftuar menjëherë ambulanca, ekipi mjekësor i mbërritur në vendngjarje konfirmoi se 84-vjeçarja ishte pa shenja jete.
Në vendin e ngjarjes kanë mbërritur forcat e Policisë së Shtetit, të cilat kanë nisur veprimet hetimore për të zbardhur rrethanat e plota të kësaj ngjarjeje.