Ish-futbollisti i Kombëtares Shqiptare, Igli Tare, ka ushtruar ankimim pranë Gjykatës së Apelit të Posaçëm kundër vendimit për sekuestrimin e një vile në fshatin Gjilekë, Dhërmi. Pasuria është sekuestruar nga Prokuroria e Posaçme (SPAK), pasi hetimet kanë ngritur dyshime se ajo përbën pasuri të fshehur të ish-zv.kryeministres dhe ish-ministres së Infrastrukturës dhe Energjisë, Belinda Balluku.
Sipas akuzës, Balluku dyshohet se e ka përfituar këtë pronë si ryshfet nga kompania Eurocol, pasi e kishte favorizuar atë në një tender gjatë kohës kur ushtronte detyrën si drejtoreshë e Albcontrol. Nga ana tjetër, Igli Tare pretendon se vila është pronë e tij e ligjshme dhe e ka kundërshtuar masën e sekuestros si të padrejtë.
Belinda Balluku po hetohet për veprat penale të abuzimit me tenderat e rrugëve, korrupsionit dhe pastrimit të produkteve të veprës penale. Gjykata e Apelit të Posaçëm pritet të shqyrtojë pretendimet e Tares në seancën e datës 30 qershor.