Instituti i Kosovës për Drejtësi (IKD) po vazhdon aktivitetin për mbledhjen e nënshkrimeve të qytetarëve në mbështetje të nismës legjislative për ndryshimin dhe plotësimin e Kodit Penal të Republikës së Kosovës. Pas aktiviteteve të zhvilluara më parë në Prishtinë dhe Gjakovë, ku nismën e mbështeti edhe kryetari i komunës Ardian Gjini, mbledhja e nënshkrimeve ka nisur sot në sheshin "Shadërvan" në Prizren.
Kjo nismë synon të adresojë dy çështje thelbësore që sipas IKD-së cenojnë sundimin e ligjit dhe integritetin zgjedhor:
• Përcaktimin e moszbatimit të qëllimshëm të vendimeve të Gjykatës Kushtetuese si vepër penale.
• Ndalimin e përdorimit të parasë publike për përfitim elektoral gjatë periudhave zgjedhore dhe parazgjedhore.
Sipas IKD-së, nevojitet mbështetja e të paktën 10 mijë qytetarëve që kjo kërkesë të procedohet në Kuvend. Gjatë qëndrimit në Prizren, nisma ka gjetur mbështetje të drejtpërdrejtë nga kryetari i kësaj komune, Shaqir Totaj, si dhe nga drejtorë të drejtorive komunale dhe anëtarë të Kuvendit Komunal.
Organizatorët bënë të ditur se aktiviteti në Prizren do të vazhdojë edhe nesër, më 31 korrik 2026, nga ora 10:00 deri në ora 15:00. IKD ka njoftuar se procesi i mbledhjes së nënshkrimeve do të shtrihet edhe në komuna të tjera të vendit, me qëllim promovimin e pjesëmarrjes qytetare dhe forcimin e mekanizmave ligjorë kundër keqpërdorimeve të pushtetit.
Përditësime
Iniciativa legjislative e IKD-së për ndryshimin e Kodit Penal është shtrirë sot në Pejë. Qytetarët po nënshkruajnë peticionin në sheshin 'Skënderbeu', ndërsa kryetari i Komunës së Pejës, Gazmend Muhaxhiri, së bashku me stafin e tij, zyrtarizoi mbështetjen për këtë nismë.