Instituti i Kosovës për Drejtësi (IKD) ka filluar sot procesin e mbledhjes së nënshkrimeve të qytetarëve në mbështetje të nismës legjislative për ndryshimin dhe plotësimin e Kodit Penal të Republikës së Kosovës. Aktiviteti po zhvillohet në sheshin “Nënë Tereza” në Prishtinë, ku qytetarët kanë mundësi të nënshkruajnë peticionin nga ora 10:00 deri në 15:00.
Drejtori ekzekutiv i IKD-së, Ehat Miftaraj, përmes një njoftimi ka ftuar qytetarët që të marrin pjesë në këtë proces, duke theksuar rëndësinë e angazhimit publik për këto ndryshime. Nisma mbështetet në Kushtetutën e Republikës së Kosovës dhe në Ligjin për Nismat Legjislative.
Sipas hulumtuesve të IKD-së, Gzim Shala dhe Naim Jakaj, propozimet përqendrohen në dy shtylla kryesore për forcimin e sundimit të ligjit:
• Përcaktimi i përgjegjësisë penale për moszbatimin e vendimeve të Gjykatës Kushtetuese.
• Sanksionimi i përdorimit të fondeve publike për përfitime elektorale gjatë periudhave zgjedhore dhe parazgjedhore.
Kjo nismë, sipas përfaqësuesve të institutit, vjen si kundërpërgjigje ndaj praktikave të deritanishme që cenojnë integritetin e garës politike dhe drejtësisë në vend.
Përditësime
Nisma legjislative e Institutit të Kosovës për Drejtësi (IKD) për ndryshimin e Kodit Penal ka mbërritur në Prizren. Qytetarët mund të nënshkruajnë peticionin në sheshin Shadërvan më 31 korrik 2026. Nisma ka marrë mbështetjen zyrtare të kryetarit të Komunës së Prizrenit, Shaqir Totaj, si dhe të drejtorëve komunalë dhe anëtarëve të Kuvendit Komunal.
Instituti i Kosovës për Drejtësi (IKD) do të vazhdojë fushatën për mbledhjen e nënshkrimeve për ndryshimin e Kodit Penal më 4 gusht 2026 në Prishtinë. Qytetarët mund të mbështesin nismën duke nënshkruar në stendën e vendosur përballë Ministrisë së Kulturës, Rinisë dhe Sportit.
Nisma legjislative e Institutit të Kosovës për Drejtësi (IKD) për ndryshimin e Kodit Penal është zgjeruar në qytetin e Ferizajt. Qytetarët dhe përfaqësuesit e shoqërisë civile në këtë qytet kanë filluar zyrtarisht mbledhjen e nënshkrimeve për të mbështetur këtë iniciativë.