Instituti i Kosovës për Drejtësi (IKD) ka njoftuar se do të vijojë mbledhjen e nënshkrimeve për nismën legjislative qytetare në sheshin “Nëna Terezë” në Prishtinë, afër Ministrisë së Kulturës, Rinisë dhe Sportit. Aktivitetet në këtë lokacion do të zhvillohen nga ora 10:00 deri në orën 15:00. Qytetarët janë të ftuar të njihen me propozimet dhe të mbështesin nismën përmes nënshkrimit të tyre, duke kontribuar në forcimin e sundimit të ligjit.
Nisma synon ndryshimin dhe plotësimin e Kodit Penal të Republikës së Kosovës përmes dy ndryshimeve thelbësore:
- Përcaktimin si vepër penale të moszbatimit të qëllimshëm të vendimeve të Gjykatës Kushtetuese.
- Sanksionimin penal të përdorimit të parasë publike për përfitim elektoral gjatë periudhave zgjedhore dhe parazgjedhore.
IKD ka zhvilluar më parë aktivitete të ngjashme në Prishtinë, Gjakovë dhe Prizren. Në këto qytete, nisma është mbështetur edhe nga kryetarët e komunave përkatëse, përkatësisht kryetari i Komunës së Gjakovës, Ardian Gjini, dhe kryetari i Komunës së Prizrenit, Shaqir Totaj. Organizata ka paralajmëruar se procesi i mbledhjes së nënshkrimeve do të shtrihet edhe në komuna të tjera të vendit, me qëllim arritjen e pragut prej 10 mijë nënshkrimesh që nevojiten për dërgimin e nismës në Kuvendin e Kosovës.
Përditësime
Instituti i Kosovës për Drejtësi (IKD) ka njoftuar se mbledhja e nënshkrimeve për ndryshimin e Kodit Penal do të zhvillohet më 4 gusht 2026, në sheshin 'Nëna Terezë' në Prishtinë. Qëllimi i këtij aktiviteti është sigurimi i 10 mijë nënshkrimeve të nevojshme për procedimin e kësaj nisme në Kuvendin e Kosovës.