Instituti i Kosovës për Drejtësi (IKD) ka filluar më 23 korrik 2026 mbledhjen e nënshkrimeve të qytetarëve në mbështetje të nismës legjislative për ndryshimin dhe plotësimin e Kodit Penal të Republikës së Kosovës. Aktiviteti po zhvillohet në sheshin “Nënë Tereza” në Prishtinë.
Sipas hulumtuesve të IKD-së, Naim Jakaj dhe Gzim Shala, kjo nismë synon të forcojë llogaridhënien dhe sundimin e ligjit. Propozimet kryesore përfshijnë:
• Klasifikimin si vepër penale të moszbatimit të qëllimshëm të vendimeve të Gjykatës Kushtetuese.
• Inkriminimin e përdorimit të parasë publike për përfitim elektoral gjatë periudhave zgjedhore.
Organizatorët theksuan se nisma mbështetet në Kushtetutën e Republikës së Kosovës dhe në Ligjin për Nismat Legjislative. IKD ka njoftuar paraprakisht Kuvendin e Kosovës për këtë hap, duke u bërë thirrje qytetarëve të mbështesin ndryshimet e propozuara përmes sigurimit të të paktën 10 mijë nënshkrimeve të nevojshme për procedim të mëtejshëm parlamentar.
Përditësime
Instituti i Kosovës për Drejtësi (IKD) ka mbledhur mbi 1,000 nënshkrime në dhjetë ditët e para të fushatës për ndryshimin e Kodit Penal. Hulumtuesi Qemajl Marmullakaj konfirmoi se ekipi po shtrin aktivitetin në Gjakovë, Prizren dhe nga nesër në Pejë, me synim arritjen e pragut prej 10,000 nënshkrimesh deri në mesin e muajit shtator 2026.