Instituti i Kosovës për Drejtësi (IKD), i përfaqësuar nga drejtori ekzekutiv Ehat Miftaraj, i është drejtuar Gjykatës Supreme me një padi ndaj Ministrisë së Financave. Objekti i kësaj kërkese është shfuqizimi i paragrafit 2 të nenit 50 të Rregullores për Rregullimin e Marrëdhënies së Punës për Zyrtarët e Administratës Tatimore të Kosovës (ATK), e cila është miratuar më 27 prill 2026.
Sipas padisë, kjo dispozitë rregullatore është e kundërligjshme pasi cenon statusin e zyrtarëve që mbajnë akte emërimi pa afat. IKD argumenton se ndryshimet e ndërmarra nga ministria, të cilat shndërrojnë emërimet pa afat në mandate katërvjeçare me kushtëzime të performancës, bien ndesh me vendimet e mëparshme të institucioneve të drejtësisë.
Në padi rikujtohet se Gjykata Kushtetuese, përmes aktgjykimit KO159/24 të publikuar më 8 maj 2025, kishte konstatuar se dispozitat përkatëse të Ligjit Nr. 08/L-257 për Administrimin e Procedurave Tatimore nuk ishin në përputhshmëri me Kushtetutën. Gjykata kishte përcaktuar qartë se zbatimi i ndryshimeve në mandatet e pozitave drejtuese në ATK nuk mund të realizohej pa plotësimin dhe ndryshimin e ligjit nga ana e Kuvendit të Kosovës.
Padia thekson se, përkundër faktit që Kuvendi nuk ka ndërmarrë ndryshimet ligjore të kërkuara, Ministria e Financave ka nxjerrë këtë rregullore duke vendosur kushte të reja për vazhdimin e mandatit. IKD pretendon se kjo nismë tejkalon kompetencat dhe cenon sigurinë juridike dhe të drejtat e fituara të zyrtarëve të ATK-së.
Në lidhje me pasojat e këtij shndërrimi, IKD vë në dukje se neni 51 i rregullores parasheh që, pas mandatit të parë, zyrtarët të cilëve nuk u vazhdohet mandati sistemohen në pozitën paraprake (nëse kanë pasur) ose në një pozitë të lirë të një kategorie më të ulët drejtuese. Në rastin kur përfundojnë dy mandate, rregullorja parasheh sistemimin në një pozitë më të ulët drejtuese ose, në mungesë të saj, në një pozicion tjetër të përshtatshëm.