Instituti Kombëtar i Shëndetësisë Publike të Kosovës (IKSHPK) ka vënë në funksion një metodë të re analitike për përcaktimin e mbetjeve të pesticideve në fruta dhe perime. Metoda zbatohet në Laboratorin e Pesticideve, pranë Departamentit të Ekologjisë Humane, dhe mundëson analizimin e mbetjeve të 31 pesticideve.
Analizat kryhen përmes kromatografisë së gaztë të lidhur me spektrometrinë e masës (GC-MS), duke përdorur pajisjen GC Agilent 8890, të lidhur me spektrometrin e masës 5977B. Sipas IKSHPK-së, metoda përfshin pesticide organoklorike, triazine, herbicide dhe insekticide piretroide.
Lista e pesticideve përfshin Etridiazole, Chloroneb, α-BHC, Simazine, β-BHC, γ-BHC, Chlorothalonil, δ-BHC, Alachlor, Heptachlor, Chlorthal-dimethyl (Dacthal), Heptachlor epoxide isomer B, trans-Chlordane, cis-Chlordane, Endosulfan I, trans-Nonachlor, p,p′-DDE, Dieldrin, Endrin, Chlorobenzilate, Endosulfan II, p,p′-DDD, Endrin aldehyde, p,p′-DDT, Methoxychlor, cis-Permethrin (1RS), trans-Permethrin, Cypermethrin, Deltamethrin dhe Lambda-cyhalothrin.
Kapaciteti aktual i laboratorit është pesë mostra në javë. IKSHPK-ja ka bërë të ditur se pritet që ky kapacitet të rritet në të ardhmen.
Sipas institutit, vënia në funksion e metodës zgjeron mundësitë analitike për monitorimin e mbetjeve të pesticideve në fruta dhe perime. IKSHPK-ja thotë se kjo kontribuon në mbrojtjen e shëndetit publik dhe në vlerësimin e sigurisë së ushqimit.