Deputetja e Partisë Demokratike, Ina Zhupa, kryetare e Komisionit Parlamentar për Turizmin, denoncoi projektligjin për ndryshimin e Ligjit nr. 9710, datë 03.04.2007, “Për portet turistike në Republikën e Shqipërisë”.
Ky projektligj ka ardhur për shqyrtim në komision si propozim i deputetes socialiste Zamira Sina. Zhupa tha se Sina ka vetëm firmën dhe, sipas intervistës së saj, nuk njihte përmbajtjen e tij. Sipas deputetes demokratike, ligji është i qeverisë dhe synon të shmangë procesin e konsultimit publik.
Zhupa argumentoi se projektligji paraqet probleme kushtetuese, ekonomike dhe të sigurisë kombëtare. Portet turistike përbëjnë infrastrukturë kritike, të lidhur me sovranitetin territorial, sigurinë detare, kontrollin kufitar, zhvillimin ekonomik dhe menaxhimin e hapësirës bregdetare. Ato janë pasuri publike me regjim të posaçëm juridik dhe administrimi i tyre duhet të udhëhiqet nga interesi publik maksimal.
Sipas saj, ligji synon t’i dhurojë portet klientëve dhe oligarkëve pranë qeverisë me statusin e investitorit strategjik. Kjo cënon konkurrencën e lirë, barazinë para ligjit, transparencën, zhvillimin turistik dhe integrimin europian të Shqipërisë, si dhe lirinë ekonomike të operatorëve.
Zhupa paralajmëroi protesta nga qytetarët kundër këtij projektligji nesër në orën 18:00, duke ftuar për pjesëmarrje në tubim.