Ina Zhupa, deputete e Partisë Demokratike dhe kryetare e komisionit për Kulturën, Turizmin dhe Diasporën, deklaroi se projektligji për ndryshime në ligjin "Për portet turistike", me nismëtare deputeten e Partisë Socialiste Zamira Sinaj, është antikushtetues.
Projekti do të shqyrtohet sot me shpejtësi në tre komisione parlamentare, për ta kaluar në seancën plenare të së enjtes. Aktualisht, legjislacioni parashikon ndërtimin e porteve turistike përmes procedurave koncesionare me konkurrim të hapur.
Sipas Zhupës, ndryshimi propozuar përjashton subjektet me statusin "Investitor Strategjik", të dhënë nga Komiteti i Investimeve Strategjike (KIS), nga detyrimi për konkurrim. Nëse ndërtimi i portit është pjesë e projektit të tyre, si një resort privat, ata fitojnë automatikisht të drejtën për ta ndërtuar dhe menaxhuar.
Ndryshe nga koncesioni, ku investimi rikthehet shtetit pas një periudhe, me këtë ndryshim porti turistik mbetet pronë e përhershme e investitorit privat. Procedurat dhe kriteret për kontratat me investitorët strategjikë do të përcaktohen me vendime të Këshillit të Ministrave, duke zëvendësuar garën e hapur me marrëveshje direkte.
Zhupa argumentoi se kjo krijon trajtim preferencial, kufizon aksesin e operatorëve të tjerë, cenon barazinë e mundësive në treg, konkurrencën e lirë dhe parimin e sigurisë publike. Ajo përmendi se ligji për investimet strategjike humb fuqinë në dhjetor 2026, duke e konsideruar të panevojshme ndërhyrjen gjashtë muaj para skadimit.