Deputetja e Partisë Demokratike, Jorida Tabaku, ka analizuar kronologjinë e Ligjit për Investimet Strategjike, të miratuar fillimisht në vitin 2015. Sipas saj, ndonëse ligji u prezantua si një masë e përkohshme për thithjen e investimeve të huaja, ai është shndërruar në një instrument për dhënien e favoreve ndaj një grupi të kufizuar përfituesish.
Në një analizë të detajuar, Tabaku theksoi se gjatë dekadës së fundit ligji ka pësuar 9 ndryshime, shumica e të cilave kanë pasur si synim zgjatjen e afatit të tij. Ajo përmendi se kërkesa e parë për shtyrje u paraqit nga qeveria në vitin 2018. Para zgjedhjeve të vitit 2025, mazhoranca miratoi një tjetër shtyrje, duke e çuar afatin e zbatimit deri më 31 dhjetor 2026.
Deputetja demokrate rikujtoi nismat e saj të mëparshme, duke përfshirë amendamentet e vitit 2015 për mbrojtjen e pronës private dhe kërkesën e vitit 2022 për ndërprerjen e efekteve të këtij ligji. Ajo bëri me dije se të gjitha këto propozime u rrëzuan nga votat e mazhorancës socialiste, e cila argumentoi se kuadri ekzistues ishte i dobishëm për ekonominë dhe po punohej për një ligj të ri.
Sipas Tabakut, ky model ligjor krijon mundësi për zhvillime jashtë procedurave standarde konkurruese, duke veçuar si shembull projektin Durrës Marina. Ajo argumentoi se përmes këtyre ndryshimeve ligjore, përfshirë ato për portet turistike, asetet publike po vihen në dispozicion pa procese të mirëfillta konkurrimi, duke e cilësuar Parlamentin si një noter të vendimeve të qeverisë.