Qeveria ka publikuar në platformën e konsultimit publik projektligjin “Për Investimet”, i cili synon të bashkojë në një kuadër të vetëm trajtimin e investitorëve vendas dhe të huaj. Nisma shfuqizon ligjin për Investimet Strategjike të vitit 2015 dhe ligjin për Investimet e Huaja të vitit 1993, por ruan mekanizma përmes të cilëve shteti mund të mbështesë projekte private.
Sipas projektligjit, mbështetja mund të përfshijë përdorimin e pronave shtetërore, ndërhyrjet në infrastrukturë, lehtësimin e procedurave administrative dhe vënien në dispozicion të brigjeve të detit. Drafti parashikon konkurrim publik, analiza të kostove dhe përfitimeve dhe monitorim, por lejon edhe përjashtime nga gara, kryesisht për investime në prona private. Ai parashikon gjithashtu krijimin e një fondi për nxitjen e investimeve, ku mund të përfshihen pasuri të paluajtshme shtetërore në zona me potencial zhvillimi, të cilat mund t’u vihen në dispozicion investimeve të përzgjedhura.
Ligji për Investimet Strategjike mbetet në fuqi deri në fund të këtij viti. Sipas burimeve, mazhoranca socialiste ia ka zgjatur efektet gjashtë herë që nga miratimi i tij më 2015. Institucionet e Bashkimit Evropian e kanë kritikuar ligjin si favorizues për një grup njerëzish pranë qeverisë.
Në relacionin e projektligjit, qeveria rendit ndër problemet e zbatimit të ligjit ekzistues përqendrimin e investimeve në turizëm, projektet e parealizuara ose të vonuara, monitorimin e pamjaftueshëm, mungesën e kritereve transparente dhe të kapaciteteve të qëndrueshme institucionale. Relacioni përmend gjithashtu rreziqe fiskale, ligjore dhe reputacionale që lidhen me masat e mbështetjes shtetërore. Qeveria argumenton se nevojiten kritere më të standardizuara, transparencë, vlerësim i kostove dhe përfitimeve dhe monitorim i vazhdueshëm.
Skemat e mbështetjes do të administrohen nga Komiteti për Nxitjen e Investimeve, i cili, sipas projektligjit, do të drejtohet nga ministri i Ekonomisë. Dispozitat kalimtare përcaktojnë se investitorët që kanë përfituar status strategjik sipas ligjit të vjetër do të vazhdojnë të mbështeten sipas procedurave të miratuara në bazë të tij.
Deputetë të opozitës dhe ekspertë të ekonomisë kanë shprehur dyshime se drafti do t’i zgjidhë problemet e ligjit ekzistues dhe kanë paralajmëruar rreziqe për transparencën, monitorimin dhe përdorimin e pronës publike. Deputetja e Partisë Demokratike dhe anëtarja e Komisionit Parlamentar për Ekonominë, Jorida Tabaku, thotë se u ka dërguar institucioneve ndërkombëtare një analizë me kundërshtimet e saj.
Sipas dokumentit që Tabaku i vuri në dispozicion BIRN, ndryshimi është kryesisht në terminologji: “Zona të Zhvillimit Prioritar” zëvendëson emërtimin “Investime Strategjike”. Tabaku thotë se ruhen përfitime si pronat publike, statusi i veçantë i trajtimit dhe ulja e taksave, dhe vlerëson se nisma nuk përmbush standardet e përafrimit me legjislacionin evropian.