Përfaqësuesja e Serbisë U-21 triumfoi ndaj Rusisë U-21 me rezultatin 2-1 në ndeshjen e dytë miqësore të zhvilluar në Stara Pazova. Takimi, i cili shënoi barazimin e llogarive pas humbjes 3-1 në sfidën e parë, u karakterizua nga një episod i dhunshëm në pjesën e dytë.
Incidenti shpërtheu në minutën e 68-të, pas një dueli mes mesfushorit rus Mikhail Umnjikov dhe atij serb Matija Mitrovic. Pas një ndërhyrjeje të pakujdesshme të Umnjikov, lojtari serb reagoi duke i hedhur diçka, gjë që solli kundërpërgjigjen e futbollistit rus dhe përshkallëzimin e situatës në shtyrje, grushte dhe shqelma. Në përleshje u përfshinë shpejt edhe lojtarë të tjerë nga të dyja ekipet, ndërsa stafi teknik ndërhyri për të shuar tensionet.
Pas qetësimit të situatës, gjyqtari Stanko Ostracanin vendosi përjashtimin e protagonistëve kryesorë: Mikhail Umnjikov u ndëshkua me karton të kuq direkt, ndërsa Matija Mitrovic mori kartonin e dytë të verdhë, duke lënë të dyja skuadrat me një lojtar më pak.
Në momentin e incidentit, Serbia kryesonte ndeshjen me rezultatin 2-1. Avantazhin për vendasit e siguroi Matija Mitrovic me një penallti në minutën e 34-t, ndërsa Marko Veliçkovic dyfishoi shifrat në fillim të pjesës së dytë. Golin e vetëm për Rusinë e shënoi Aleksandar Pomaljuk në minutën e 64-t, gjithashtu nga pika e bardhë. Rezultati nuk ndryshoi deri në vërshëllimën përfundimtare.