Industria gjermane po përballet me sfida të konsiderueshme, të nxitura nga kostot e larta të prodhimit dhe rënia e kërkesës. Për shkak të presioneve financiare, shumë ndërmarrje kanë nisur zhvendosjen e proceseve industriale drejt vendeve ku shpenzimet janë më konkurruese, me Hungarinë si një ndër destinacionet kryesore.
Kompania KACO, e cila ka operuar prej 50 vitesh në Kirchardt, është një ndër rastet që ka zhvendosur linja të shumta të prodhimit gjatë këtij viti. Drejtori ekzekutiv, Gernot-Alois Feiel, thekson se presioni i kostove, inflacioni dhe rënia e çmimeve nga klientët e mëdhenj e bëjnë prodhimin në Gjermani gjithnjë e më pak tërheqës. Në vitet e fundit, kompania ka shkurtuar 174 vende pune, kryesisht në prodhim.
Sipas një studimi të realizuar nga kompania konsulente Horváth me 1.000 drejtues kompanish, strategjia "Local-for-Local" është bërë thelbësore për të shmangur tarifat doganore dhe vështirësitë në zinxhirët e furnizimit. Ndërsa eksportet nga Gjermania pritet të ulen, 52 përqind e drejtuesve shohin potencial për rritje të punësimit në Evropën Lindore.
Hungaria ka tërhequr investime të mëdha nga gjigantë të industrisë si BMW, Audi dhe Mercedes-Benz. Drejtori i Mercedesit, Ola Källenius, ka vlerësuar se shpenzimet e prodhimit në Hungari vendosin standarde për Evropën, duke qenë deri në 70 përqind më të ulëta se në Gjermani. Avantazhet kryesore të përmendura përfshijnë:
- Kosto më e ulët e punës: 15,60 euro për orë krahasuar me 49,50 euro.
- Java e punës: 40 orë në Hungari kundrejt 35 orëve në Gjermani.
- Shkalla e mungesave për shkak të sëmundjeve është dukshëm më e ulët në Hungari.
Krahas investimeve gjermane, Hungaria po kthehet në një nyje edhe për prodhuesit kinezë si CATL dhe BYD, të cilët po ndërtojnë uzina të mëdha në Debrecen dhe rajone të tjera.