Një studim i ri mbi një injeksion eksperimental, të njohur si amivantamab, ka treguar rezultate premtuese në trajtimin e pacientëve me kancer të kokës dhe qafës, të cilët nuk kishin përgjigje ndaj terapive konvencionale si kimioterapia apo imunoterapia. Injeksioni, i zhvilluar nga kompania farmaceutike Johnson & Johnson, administrohet nën lëkurë dhe vepron duke bllokuar mekanizmat e rritjes së tumorit, ndërkohë që stimulon sistemin imunitar për ta luftuar atë.
Në provën klinike të kryer në 11 shtete, morën pjesë 102 pacientë. Të dhënat treguan se tek 43 prej tyre tumoret u zvogëluan ose u eliminuan, ndërsa në 15 raste u konstatua zhdukja e plotë e qelizave kancerogjene. Sipas studiuesve, efektet e trajtimit u vërejtën brenda pak javësh, ndërsa shumica e efekteve anësore u raportuan si të lehta ose mesatare.
Profesori i terapive biologjike në Institutin e Kërkimeve të Kancerit në Londër, Kevin Harrington, theksoi se ky trajtim ofron një mundësi të rëndësishme për pacientët me opsione të kufizuara terapeutike. Përveç kancerit të kokës dhe qafës, amivantamab po vlerësohet aktualisht në rreth 60 prova klinike për lloje të tjera të sëmundjes, përfshirë kancerin e mushkërive, të stomakut, të trurit dhe atë kolorektal. Gjetjet e plota të këtij studimi pritet të prezantohen zyrtarisht në konferencën vjetore të Shoqatës Amerikane të Onkologjisë Klinike (ASCO) që do të mbahet në Çikago.