Një test i thjeshtë gjaku mund të parashikojë reagimin ndaj trajtimit për pacientët me kancer të avancuar të gjirit, duke ndihmuar mjekët të zgjedhin terapinë më efektive dhe të shmangin ato jo të nevojshme. Ky test analizon ADN-në e tumorit që qarkullon në gjak (ctDNA) dhe vlerësohet para fillimit të terapisë ose pas katër javësh.
Studimi, i kryer nga studiues të Institutit për Kërkime mbi Kancerin në Londër (ICR), përfshiu 167 pacientë. Rezultatet treguan se pacientët me nivele të ulëta të ctDNA-së në fillim të trajtimit kishin gjasa më të mëdha të përfitonin nga terapia dhe një periudhë më të gjatë pa përparim të sëmundjes.
Pacientët u ndanë në dy grupe:
- Një grup me mutacione gjenetike të trajtueshme;
- Një grup me kancer gjiri trefish negativ, formë agresive që përbën 10-15% të rasteve.
Në grupin e dytë, pacientët me nivele të ulëta të ctDNA-së para trajtimit jetuan mesatarisht më shumë se dyfish pa përkeqësim të sëmundjes, krahasuar me ata me nivele të larta. Analizat pas katër javësh konfirmuan se mungesa e ctDNA-së në gjak shoqërohet me rezultate më të mira dhe kontroll më të gjatë të sëmundjes.
Sipas studiuesve, testi lejon ndryshimin e trajtimit në kohë, duke ofruar alternativa si terapi specifike, kombinime barnash ose pjesëmarrje në studime klinike. Është metodë jo-invazive, e shpejtë dhe e besueshme për monitorimin dhe personalizimin e terapisë.
Profesor Nicholas Turner nga ICR thekson se, edhe pse studimi u fokusua në kancerin e avancuar, testi mund të aplikohet edhe në fazat e hershme, duke e bërë trajtimin më të shpejtë dhe të përshtatshëm.