Pas njoftimit nga Policia e Kosovës rreth orës 19:00, Inspektorati Qendror i Punës (IQP) ka kryer një inspektim në vendin e ngjarjes në një shtëpi private në Prizren, ku po zhvilloheshin punime për renovimin e kulmit.
Sipas raportit zyrtar të IQP-së, të dhënat fillestare konfirmojnë se viktima nuk ka qenë punëtor i angazhuar në procesin e ndërtimit. Personi që humbi jetën ishte vëllai i pronarit të shtëpisë dhe nuk ishte pjesë e ekipit të punëkryesve.
Inspektorati ka konstatuar se në këtë rast nuk ka ekzistuar asnjë marrëdhënie kontraktuale ndërmjet investitorit dhe punëkryesit. Për rrjedhojë, nuk është evidentuar asnjë marrëdhënie pune sipas përcaktimeve ligjore në fuqi.