Shoqata e avokatëve shqiptaro-britanikë (BALA), në bashkëpunim me Inspektorin e Lartë të Drejtësisë, organizoi më 16 prill në Tiranë një bashkëbisedim me juristë nga diaspora shqiptare. Takimi u zhvillua në kuadër të Samitit të IV të Diasporës dhe u mikprit nga Artur Metani, Inspektor i Lartë i Drejtësisë. Morën pjesë gjithashtu Ilir Rusi, Kryetar i Këshillit të Lartë Gjyqësor, dhe Olsian Çela, Prokuror i Përgjithshëm.
Diskutimi, i moderuar nga kryetarja e BALA-së, Brikena Muharremi, u fokusua në temën “Reforma në drejtësi në Shqipëri dhe kontributi i diasporës shqiptare për shtetin e së drejtës”. Pjesëmarrësit theksuan rëndësinë e bashkëpunimit mes institucioneve vendase dhe ekspertizës së diasporës për forcimin e sistemit të drejtësisë.
Artur Metani u shpreh se institucionet kanë detyrimin që marrëdhëniet me shqiptarët jashtë vendit të trajtohen me të njëjtën vëmendje si me qytetarët në Shqipëri. Gjatë prezantimit të funksioneve të Zyrës së Inspektorit të Lartë të Drejtësisë (ILD), ai theksoi se puna e këtij institucioni bazohet në balancën midis përgjegjësisë së magjistratëve dhe respektimit të pavarësisë së tyre. Kontrolli nga ILD nuk është çështje emocionesh, por detyrim ligjor, dhe gjyqtarët si dhe prokurorët duhet të ndiejnë se puna e tyre kontrollohet në mënyrë kushtetuese.
Olsian Çela vlerësoi takimin si të rëndësishëm dhe theksoi nevojën që profesionistët e diasporës të kuptojnë shërbimin e prokurorisë dhe të kenë perceptim të saktë për punën e saj. Ai u ndal te transformimi i thellë i sistemit për shkak të reformës në drejtësi, duke evidentuar pritshmëritë e larta të publikut si sfidë afatgjatë dhe të përditshme.