Shteti shqiptar ka filluar zbatimin e një projekti për vendosjen e kamerave me inteligjencë artificiale (IA) në njëzet shkolla, të përqendruara kryesisht në Tiranë dhe Kamëz. Sistemi analizon pamjet në kohë reale për të identifikuar sjellje të programuara paraprakisht si potencialisht të rrezikshme, duke dërguar sinjalizime te strukturat përgjegjëse për verifikim. Sipas Ministrisë së Brendshme, platforma e analizës së videos nuk kryen përpunim audio dhe funksionon në përputhje me legjislacionin për mbrojtjen e të dhënave personale.
Kryeministri Edi Rama e ka vlerësuar këtë nismë si një mjet parandalues për incidente, në një kohë kur siguria në shkolla mbetet një temë tejet e ndjeshme pas vrasjes së nxënësit Martin Cani në nëntor të vitit 2024. Megjithatë, nisma ka nxitur debate lidhur me mbikëqyrjen dhe privatësinë e të miturve. Aktivistja Ermelinda Hoxhaj, përfaqësuese e grupimit “Prindër për arsim cilësor”, ka deklaruar se prindërit nuk janë konsultuar për vendosjen e këtij sistemi, duke paralajmëruar se monitorimi i vazhdueshëm mund të ndikojë negativisht në mirëqenien psikologjike të nxënësve.
Ekspertët vënë në dukje se në Shqipëri ende nuk është miratuar një ligj specifik për Inteligjencën Artificiale, çka krijon paqartësi mbi mënyrën e administrimit të të dhënave të mbledhura. Ndërsa Ministria e Brendshme pohon se procesi i konsultimit me prindërit është zhvilluar, Ministria e Arsimit nuk ka konfirmuar zyrtarisht ekzistencën e dokumentacionit që dëshmon këto konsultime. Ekspertja e politikave digjitale, Orkidea Xhaferraj, thekson se mungesa e transparencës mbi funksionimin e sistemit e bën të vështirë vlerësimin e plotë të ndikimit të kësaj teknologjie dhe pasojave të saj mbi privatësinë e nxënësve.
Përditësime
Zv.ministrja e Arsimit, Herida Duro, deklaroi zyrtarisht se pamjet e mbledhura nga sistemi i inteligjencës artificiale nuk dërgohen jashtë territorit të Shqipërisë. Sipas Ministrisë, të dhënat ruhen në serverat lokalë të shkollave. Sistemi, i cili është pjesë e projektit pilot 'Smart City', fokusohet ekskluzivisht në monitorimin e oborreve dhe zonave përreth për të parandaluar situata që cenojnë sigurinë. Zv.ministrja Duro saktësoi se kamerat nuk përfshijnë ambientet e brendshme të klasave.