Presidenti dhe zëvendëspresidenti i kompanisë AAFS Infrastructure and Energy LLC, Joseph Flynn dhe Jesse Binnall, vizituan Sarajevën më 12 janar për të biseduar me udhëheqësit vendorë mbi rolin e kapitalit dhe burimeve amerikane në zhvillimin dhe menaxhimin e gazsjellësit Ndërlidhja Jugore, njoftoi Ambasada amerikane.
Ndërlidhja Jugore është një tubacion gazi që do ta lidhë Bosnje e Hercegovinën me sistemin kroat të gazit dhe terminalin e gazit të lëngshëm natyror (LNG) në ishullin kroat Krk. Bosnja nuk prodhon gaz, prandaj furnizohet me gaz rus që vjen nëpërmjet Rrjedhës Turke përmes Serbisë, nëpërmjet tubacionit të vetëm të gazit nga Zvorniku në Sarajevë, i cili u ndërtua 40 vjet më parë.
"Ky është një projekt që duhet të mundësojë furnizimin me gaz natyror të lëngshëm amerikan dhe të besueshëm në Bosnje, gjë që do të forcojë sigurinë energjetike për të gjithë qytetarët", tha Ambasada amerikane në një deklaratë në platformën X.
Njoftimi i Ambasadës erdhi pasi i ngarkuari me punë në Ambasadën amerikane, John Ginkel, bisedoi me udhëheqësit e kompanisë Flynn dhe Binnall. Ministri i Punëve të Jashtme i Bosnjës, Elmedin Konakoviq, më pas u takua me përfaqësuesit e AAFS dhe të Ginkel.
Në takim u diskutua avancimi i projekteve me rëndësi strategjike për sigurinë energjetike të Bosnjës, forcimi i lidhjes rajonale dhe zhvillimi ekonomik afatgjatë. U konfirmua angazhimi i përbashkët për thellimin e bashkëpunimit, inkurajimin e investimeve dhe përshpejtimin e zbatimit të projekteve të infrastrukturës.
Detaje për projektin Ndërlidhja Jugore
Rruga e Ndërlidhjes Jugore do të fillojë në Travnik, në pjesën qendrore të Bosnjës, do të kalojë nëpër Tomislavgrad dhe Posushje në juglindje të vendit, do të kalojë kufirin pranë Imotskit dhe do të lidhet me rrjetin kroat pranë Makarskës, duke vazhduar drejt Splitit. Është planifikuar gjithashtu një degëzim drejt Mostarit.
Seksioni që kalon nëpër Bosnje do të jetë rreth 170 kilometra i gjatë dhe kostoja e ndërtimit e vlerësuar shkon midis 405 dhe 810 milionë.