Zëvendësministri i Jashtëm iranian, Kazem Gharibabadi, paralajmëroi se kalimi i sigurt nëpër Ngushticën e Hormuzit nuk mund të garantohet pa një koordinim të drejtpërdrejtë me Teheranin. Në një reagim në platformën X, më 26 qershor, zyrtari iranian theksoi se çdo përpjekje për të anashkaluar rolin e Iranit si shtet bregdetar është e papranueshme.
Sipas Gharibabadit, çdo kornizë e besueshme duhet të bazohet në dispozitat e nenit 5 të Memorandumit të Mirëkuptimit të Islamabadit. Ai paralajmëroi se, në të kundërt, çdo rrugë paralele që nuk është dakordësuar me palën iraniane mund të pezullohet. Ky qëndrim u mbështet edhe nga Korpusi i Gardës Revolucionare Islamike, që më 25 qershor deklaroi se kalimi do të jetë i sigurt vetëm në rrugët e miratuara nga Teherani.
Debati është ashpërsuar pas njoftimit të Omanit, më 24 qershor, për krijimin e një rruge të përkohshme detare në koordinim me Organizatën Ndërkombëtare Detare (IMO). Irani argumenton se ky veprim bie ndesh me marrëveshjen kornizë të arritur me SHBA-në më 17 qershor, e cila kërkon që Irani dhe Omani të diskutojnë për administrimin e ardhshëm të shërbimeve detare, në koordinim me shtetet e tjera të Gjirit Persik.
Ngushtica e Hormuzit mbetet një nyjë kritike për tregtinë ndërkombëtare. Pas sulmeve amerikane dhe izraelite të datës 28 shkurt, Irani kishte kufizuar ndjeshëm qarkullimin në këtë zonë, ku kalon përafërsisht një e pesta e furnizimit global me naftë.