Irani ka hartuar një mekanizëm për të rregulluar trafikun detar përmes një rruge të caktuar në Ngushticën e Hormuzit dhe do të vendosë tarifa për shërbimet e specializuara të ofruara në kuadër të këtij sistemi.
Ebrahim Azizi, kryetar i Komitetit për Siguri Kombëtare dhe Politikë të Jashtme në parlamentin iranian, njoftoi se vetëm anijet tregtare dhe palët që bashkëpunojnë me Iranin do të përfitojnë prej këtij procesi. Ai theksoi se Teherani do ta publikojë planin së shpejti dhe se kjo rrugë do të mbetet e mbyllur për operatorët e të ashtuquajturit "projekt i lirisë".
Konflikti midis Iranit dhe Shteteve të Bashkuara të Amerikës me Izraelin filloi më 28 shkurt, kur SHBA-ja dhe Izraeli nisën sulme ndaj Iranit. Teherani reagoi me hakmarrje kundër Izraelit dhe aleatëve të Uashingtonit në Gjirin Persik, duke mbyllur Ngushticën e Hormuzit.
Një armëpushim hyri në fuqi më 8 prill përmes ndërmjetësimit pakistanez, por bisedimet në Islamabad nuk prodhuan një marrëveshje të qëndrueshme. Që nga 13 prilli, Shtetet e Bashkuara kanë vendosur bllokadë detare ndaj trafikut detar iranian në ngushticë.
Presidenti amerikan Donald Trump shpalli në fillim të majit "Projektin Liria", me të cilin u zotua të shoqërojë anijet përmes Ngushticës së Hormuzit, pavarësisht qëndrimit iranian se çdo kalim kërkon miratim paraprak. Më vonë ai njoftoi pezullimin e kësaj nisme.