Në një bisedë në podkastin e David Senra, të titulluar “Ivanka Trump në ndërtimin e një jete autentike”, vajza e presidentit amerikan Donald Trump përshkroi rrethanat e zbulimit të ishullit të Sazanit. Ajo tregoi se e zbuloi zonën në mënyrë të rastësishme gjatë një udhëtimi me varkën e një miku, kur ndaluan për të notuar. "Notuam drejt ishullit, u ngjitëm zbathur deri në majë dhe mbetëm të mahnitur", u shpreh ajo.
Sipas Ivanka Trump, zhvillimi i këtij projekti po kryhet në bashkëpunim me bashkëshortin e saj. Ajo theksoi se fokusi kryesor është arkitektura, e cila duhet të integrohet në mënyrë të përkryer me terrenin natyror, duke e cilësuar atë si një "manifestim të prekshëm" të vizionit të saj. Sipërmarrësja nënvizoi se projekti nuk shihet thjesht si një biznes, por si një sfidë personale.
Në lidhje me gjeografinë e investimit, ajo sqaroi se plani përfshin ishullin dhe rreth pesë milje vijë bregdetare përballë tij, e cila karakterizohet nga prania e një lagune dhe plazheve me rërë të bardhë. Për më tepër, ajo shprehu angazhimin për të njohur më mirë vendin ku po investon, duke shtuar se është duke lexuar autorë shqiptarë për të kuptuar më mirë kulturën dhe perspektivën vendase.