Jamie Shea, ish-zëdhënës i NATO-s në kohën e bombardimeve të vitit 1999, deklaroi në emisionin "Info Magazine" të Klan Kosova se forcat e KFOR-it duhet të mbeten në Kosovë deri në anëtarësimin e saj në Aleancën Veri-Atlantike.
Ai shpjegoi nevojën për vazhdimësinë e këtij misioni për shkak të tensioneve të vazhdueshme në vend. "KFOR-i është i nevojshëm akoma. Sepse kemi ende tensione në Kosovë. Kishim rastin e incidentit në Banjskë para tre vitesh dhe kemi Serbinë që kohë pas kohe bën zhurma kërcënuese duke vendosur trupa ushtarake në kufirin me Kosovë, kështu që ende na duhet KFOR-i aty", tha Shea.
Sipas tij, KFOR-i siguron jo vetëm kosovarët, por edhe pakicën serbe në veri, pasi kjo forcë paqeruajtëse mbron të gjithë. Ai propozoi rregullimin e nivelit të forcave sipas situatës së sigurisë dhe theksoi se prania e tyre do të sigurojë një tranzicion të butë drejt anëtarësimit në NATO. "Sa kohë që KFOR-i është aty, Kosovë është në radarin e NATO-s, që unë mendoj se është e rëndësishme për Kosovën që të marrë vëmendjen e kërkuar nga Brukseli".
Shea vlerësoi se prania e KFOR-it ofron mundësi të vlefshme për Forcën e Sigurisë së Kosovës (FSK) në trajnime dhe stërvitje për të arritur përshtatshmëri me standardet e NATO-s. Ai e krahasoi me një lojtar tenisi që ka trajnerin pranë, duke thënë se kjo përshpejton integrimin e Kosovës në Aleancë.
Më tej, ai nënvizoi se mbajtja e KFOR-it nuk është e vështirë për NATO-në, për shkak të numrit të vogël të trupave dhe harxhimeve të ulëta. Ky mision ka kryer punë të shkëlqyer për ruajtjen e stabilitetit në Ballkanin Perëndimor, prandaj disa elementë të tij duhet të qëndrojnë deri në hyrjen e Kosovës në NATO.